സമരചരിത്രം

കാര്‍ഷികജന്യമായ സംസ്കൃതിയാണ് ഈ ഗ്രാമത്തിന്റേത്. കാര്‍ഷിക ബന്ധത്തിലധിഷ്ഠിതമായ സാമൂഹ്യക്രമമായിരുന്നു നിലനിന്നത്. ഭൂവുടമസ്ഥരല്ലാത്ത കര്‍ഷക കൂട്ടങ്ങളായിരുന്ന സമ്പദ്ഘടനയുടെ നട്ടെല്ലായി വര്‍ത്തിച്ചത് വിരലിലൊതുങ്ങുന്ന വന്‍ പ്രമാണിമാരുടെ കൈയിലായിരുന്നു ഈ ഗ്രാമത്തിലെ ഭൂസ്വത്തുമുഴുവനും. കാട്ടുമാടം നമ്പൂതിരി (പൊന്നാനി) ഇതില്‍ പ്രധാനിയാണ്. 1920-കളുടെ അവസാനമാണ് മേപ്പയ്യൂരില്‍ ദേശീയസമരത്തിന് സംഘടനാപരമായ രൂപം കൈവരുന്നത്. അയിത്തവിരുദ്ധ പ്രക്ഷോഭം, ഹിന്ദിപഠനക്ളാസ്, വയോജന വിദ്യാഭ്യാസം ഇവ വ്യാപകമായി സംഘടിപ്പിക്കപ്പെട്ടു. 1930-ല്‍ ഉപ്പു കുറുക്കല്‍ സമരത്തിന്റെ ഭാഗമായി പള്ളിക്കരയിലെ ഇ.പി.കുഞ്ഞിക്കണ്ണന്‍ നമ്പ്യാരുടെ നേതൃത്വത്തില്‍ നടന്ന ജാഥക്ക് മേപ്പയ്യൂരിലും നരക്കോട്ടും നല്‍കിയ സ്വീകരണം പ്രാധാന്യമര്‍ഹിക്കുന്നു. നരക്കോട് കേന്ദ്രത്തില്‍, ആവേശഭരിതരായ മൂന്നുപേര്‍ മല്ല്മല്‍മുണ്ട് കത്തിച്ചുകൊണ്ട് പ്രതികരിച്ചു. ഈ ജാഥക്കുശേഷമാണ് ഇ.സി.അപ്പുനമ്പ്യാര്‍ ദേശീയപ്രസ്ഥാനത്തിന്റെ സജീവ വക്താവായി മാറുന്നത്. മഠത്തും ഭാഗത്ത് വാകയാട്ടില്ലത്തെ പീടികമുകളില്‍ ഇ.സി.അപ്പുനമ്പ്യാര്‍, തെക്കെകൊപ്പാരത്ത് ഗോപാലന്‍നായര്‍, നാഗത്തിങ്കല്‍ കുഞ്ഞിരാമന്‍നായര്‍, ദാമോദരന്‍ എമ്പ്രാന്തിരി, വാകയാട്ടില്ലത്ത് കുഞ്ഞികൃഷ്ണന്‍ എമ്പ്രാന്തിരി എന്നിവരുടെ നേതൃത്വത്തിലും കൊഴുക്കല്ലൂരില്‍ പുഷ്പോത്ത് നമ്പീശന്റെ നേതൃത്വത്തിലും നടന്ന നൂല്‍നൂല്‍പ് എടുത്തു പറയത്തക്കതാണ്. കൊഴുക്കല്ലൂരിലും നിടുമ്പൊയിലിലും നടന്ന വയോജനവിദ്യാഭ്യാസ ക്ളാസ്സുകള്‍ പ്രസ്ഥാനത്തിന് മുതല്‍കൂട്ടായി. അവര്‍ണ്ണസ്ത്രീകളുടെ മാറുമറയ്ക്കലും സവര്‍ണ്ണേതര വിഭാഗക്കാരുടെ അസ്തിത്വസ്ഥാപനവും ഒരു പ്രശ്നമായിരുന്നു. 1939-ല്‍ കേളപ്പജി പങ്കെടുത്ത അയിത്തോച്ഛാടന സമ്മേളനം നരക്കോട് നടന്നു. ഡോ.കുട്ടി ആയിരുന്നു അധ്യക്ഷന്‍ ഈ സമ്മേളന തീരുമാനപ്രകാരമാണ് രണ്ട് പുലയകുട്ടികള്‍ ആദ്യമായി കൊഴുക്കല്ലൂര്‍ എല്‍.പി.സ്കൂളില്‍ ചേര്‍ക്കപ്പെടുന്നത്. പൊന്നാനി കേന്ദ്രമായി മലബാര്‍ മുഴുവന്‍ ഭൂവുടമത്വവും ആത്മീയ നേതൃത്വവുമുള്ള കാട്ടുമാടം വകയായി 366 മഠങ്ങള്‍ കേരളത്തിന്റെ വിവിധ ഭാഗങ്ങളില്‍ നിലനിന്നിരുന്നു. അതിലുള്‍പ്പെടുന്നതാണ് മേപ്പയ്യൂര്‍ ദേശത്തിലെ ശ്രീകണ്ഠമനശാലമഠവും കാട്ടുമഠവും. വയലുകളില്‍ മാടുകള്‍ക്കുപകരം മനുഷ്യരെ കലപ്പക്ക് കെട്ടുന്ന പ്രാകൃതത്വം ഈ പഞ്ചായത്തില്‍ ഉണ്ടായിരുന്നു. മേപ്പയ്യൂര്‍, കൊഴുക്കല്ലൂര്‍ ഭാഗങ്ങളില്‍ പറയ സമുദായത്തില്‍പെട്ടവരെ ഉഴവുമൃഗത്തിന് തുല്യമാക്കുന്ന മൃഗീയതയുണ്ടായിരുന്നു. ഇതിനെതിരെ ഇ.സി.അപ്പുനമ്പ്യാര്‍ പറയരെ സംഘടിപ്പിച്ച് ജാഥ നടത്തുകയും പ്രമാണിയായ ഒരാളുടെ വീട്ടില്‍ പറയരോടൊപ്പം സംഘടിതമായി വിവാഹസദ്യയില്‍ ഭക്ഷണത്തിനിരിക്കുകയും ചെയ്തു. വലിയ കോളിളക്കം സൃഷ്ടിച്ച ഒരു സംഭവമായി ഇ.സി.യുടെ നേതൃത്വത്തില്‍ നടന്ന ഈ പറയജാഥ. 330-ാം നമ്പര്‍ റേഷന്‍ഷാപ്പ് കത്തിയ സംഭവവുമായി ബന്ധപ്പെട്ട കേസുകളും പോലീസ് നരനായാട്ടും മേപ്പയ്യൂരിന്റെ രാഷ്ട്രീയ ചരിത്രത്തിലെ ഒരു പ്രധാന സംഭവമാണ്. കുറുമ്പ്രനാട് താലൂക്കിന്റെ സമരതീക്ഷ്ണമായ ഇന്നലെകളുടെ പ്രതീകമാണ് കൂത്താളി കര്‍ഷകസമരം. മൂന്ന് ചെമ്മണ്‍പാതകളില്‍ തുടങ്ങുന്നു മേപ്പയ്യൂരിലെ ഗതാഗത ചരിത്രം. പേരാമ്പ്ര-പയ്യോളിറോഡ്, മേപ്പയ്യൂര്‍-കീഴ്പ്പയൂര്‍ റോഡ്, മേപ്പയ്യൂര്‍-ചെറുവണ്ണൂര്‍ റോഡ് എന്നിവ മാത്രമായിരുന്നു പഞ്ചായത്തിലെ ആദ്യകാല റോഡുകള്‍. പയ്യോളി-മേപ്പയ്യൂര്‍ റോഡാണ് ആദ്യം ടാര്‍ ചെയ്തത്. പഞ്ചായത്തിന്റെ ഭൂമിശാസ്ത്രപരമായ കിടപ്പനുസരിച്ച് സൌകര്യപ്രദമായ രൂപത്തിലാണ് പഞ്ചായത്തിലെ പ്രധാനപ്പെട്ട റോഡുകള്‍ കടന്നുപോകുന്നത്.